Қызылордада оқыс оқиға! Мұнда 81 оқушы мен 2 мұғалім газдан уланып қалды деп хабарлайды КТК арнасы.
Оқыс оқиға Қалтай Мұхамеджанов атындағы мектеп-гимназияда болған.
“Үлкен қызым, 6-шы сынып оқушысы Әмірхан Сара хабарласты. Басым ауырып тұр. Біздің мектепте газдың иісі шығып жатыр деді. Жұмыстан жедел жеткеннен кейін қызымның екі көзі қызарып, басы айналып тұрғанын көрдім”, – дейді оқушының анасы Ақманат Ниятова.
Екінші ауысым кезінде мектеп ғимаратындағы белгісіз улы иістен оқушылар өздерін жайсыз сезініпті. Балалар дереу қауіпсіз жерге шығарылып, жедел жәрдем шақырылған.
Біразына сол жерде көмек көрсетілгенімен, 47 оқушы әлі де дәрігерлердің бақылауында. Қалғандары үйіне жіберілген. Мектеп басшылығы білім ошағындағы төтенше жағдайды сотқар оқушылардың әрекеті деп отыр.
Десе де, 81 оқушы мен 2 ұстаздың улануының нақты себебін Астанадан жеткен мамандар анықтайтын болады. Қазір қылмыстық іс қозғалып, тергеу амалдары жүріп жатыр.
Дереккөз: КТК арнасы
