Орталық сайлау комиссиясының төрағасы Қуандық Тұрғанқұлов Қазақстан президенттігіне кандидат Нұрсұлтан Назарбаевты қолдайтын үгіт-насихат материалдарының өзге екі кандидаттың үгіт-насихат материалдарынан асып кетуін Назарбаевтың сайлау қорының молдығымен түсіндірді.
Бүгін Астанада ЕҚЫҰ-ның Адам құқықтары және демократиялық институттар бюросының кезектен тыс сайлауды бақылау миссиясы басшысы Корнелие Виллемин Анке Йонкермен кездескен Тұрғанқұлов: “Кандидат Назарбаевтың сайлау қоры басқа кандидаттардың қорынан бірнеше есеге үлкен болуы себепті оның халыққа көп билбордтар мен басқа да сыртқы үгіт-насихат материалдарын көптеп таратуына мүмкіншілігі бар” деген.
Тұрғанқұловтың сөзінше, жүргізілген мониторинг нәтижелері кандидаттарға “ақпарат құралдарында бірдей мүмкіншілік беріліп отырғанын” көрсеткен.
Қазақстанда кезектен тыс президент сайлауы 26 сәуірге белгіленген.
Президенттікке кандидат ретінде үш адам – “Нұр Отан” партиясы ұсынған қазіргі президент Нұрсұлтан Назарбаев, билікшіл Қазақстан халықтық коммунистік партиясы ұсынған Тұрғын Сыздықов пен өзін өзі ұсынған Қазақстан кәсіподақтары федерациясының төрағасы Әбілғазы Құсайынов тіркелген.
Дереккөз: Азаттық
