ОСК дауыс берудің алғашқы нәтижелерін жария етті

Республика бойынша сайлаушылардың белсенділігі жоғары. Бұл туралы бүгін Орталық сайлау комиссиясында өткен брифингте ОСК мүшесі Ләззат Сүлеймен айтты.

“Сіздерге Орталық сайлау комиссиясының Қазақстан Республикасы Президентін сайлауда сағат 10.00-ға сайлаушылардың дауыс беруге келуі туралы мәліметті бермекпіз. Облыстардың, Астана және Алматы қалаларының сайлау комиссияларының ұсынған мәліметтеріне сәйкес, 26 сәуірдегі сағат 10-00-дегі жағдай бойынша тізімге енгізілген сайлаушылардың 19,17 пайызы сайлау бюллетенін алды”, – деді комиссия мүшесі.

Сүлейменнің атап өтуінше, олардың ішінде, Ақмола облысы бойынша – 23,48, Ақтөбе облысы бойынша – 16,8, Алматы облысы бойынша – 26,10, Атырау облысы бойынша – 11,13, Шығыс Қазақстан облысы бойынша – 27,31, Жамбыл облысы бойынша – 21,69, Батыс Қазақстан облысы бойынша – 12,11, Қарағанды облысы бойынша – 21,6, Қызылорда облысы бойынша – 22,03, Қостанай облысы бойынша – 27,61, Маңғыстау облысы бойынша – 16,92, Павлодар облысы бойынша – 21,32, Солтүстік Қазақстан облысы бойынша – 26,45, Оңтүстік Қазақастан облысы бойынша -13,89, Астана қаласы бойынша – 12,92, ал Алматы қаласы бойынша – 8,33 пайызды құрайды.

“Өздеріңіз білесіздер, дауыс беру 9741 сайлау учаскесінде жүріп жатыр. Қазіргі сайлау учаскелерінен келіп түскен мәліметтерге сәйкес сайлаушылардың белсенділігі өте жоғары”, – деді ол.