Астанадағы Тәуелсіздік сарайында президент Нұрсұлтан Әбішұлы Назарбаевтың ұлықтау салтанатты рәсімі басталды.
Айтулы шара барысында мемлекет басшысы Нұрсұлтан Назарбаев салтанатты ант берді деп хабарлайды Қазақпарат.
Ұлықтау рәсімі өтетін салтанатты залға ең алдымен Қазақстан Республикасының Туы, штандарты мен Конституциясы әкелінді. Бұдан кейін елбасы Ақордадан шыққан сәтінен бастап, Сарайға дейін арнайы салтанатты кортежбен жүріп өтті.
Сонымен қатар, Заңға сәйкес, Республика президентi Нұрсұлтан Назарбаев Конституцияға қолын қойып тұрып: «Қазақстан халқына адал қызмет етуге, Қазақстан Республикасының Конституциясы мен заңдарын қатаң сақтауға, азаматтардың құқықтары мен бостандықтарына кепiлдiк беруге, Қазақстан Республикасы президентiнiң өзiме жүктелген мәртебелi мiндетiн адал атқаруға салтанатты түрде ант етемiн», – деп халыққа ант берді.
Міне, осы сәттен бастап президент ресми қызметiне кiрiскен болып саналады. Республика президентi анттың мәтiнiн мемлекеттiк тiлде айтты. Ант беру салтанатты жағдайда парламент депутаттарының, Конституциялық Кеңес мүшелерінің, Жоғарғы Сот судьяларының, сондай-ақ басқа да мемлекеттік органдар өкілдерінің қатысуымен өткізілді.
Ант берiлгеннен кейiн Қазақстан Республикасының Мемлекеттiк Гимнi орындалды. Сонымен қатар, Орталық сайлау комиссиясының төрағасы президентке Қазақстан Республикасы президентiнiң куәлiгiн тапсырды.
Еске сала кетейік, Қазақстанда кезектен тыс президенттік сайлау 2015 жылғы 26 сәуірде өтті. Сайлауға үш кандидат, Қазақстанның Іс басындағы президенті, «Нұр Отан» партиясынан кандидат Нұрсұлтан Назарбаев, Коммунистік халықтық партия ОК хатшысы Тұрғын Сыздықов, өзін-өзі ұсынған Қазақстан Кәсіподақтары федерациясының төрағасы Әбілғазы Құсайынов қатысты.
28 сәуірде Қазақстан Республикасы Орталық сайлау комиссиясының отырысы болды, онда 2015 жылғы 26 сәуірде өткен Қазақстан Республикасы президентінің кезектен тыс сайлауының қорытындылары жарияланды. Нұрсұлтан Назарбаев үшін 8 млн. 833 мың 250 адам, немесе 97,75 пайызы дауыс берді.
Дереккөз: ИА «Казинформ»
http://www.nur.kz/743501.html
