Қазақстанның ІІМ 2014 жылы Батыс пен Ресейдің өзара санкциялары салдарынан қару-жарақ сатып ала алмады, деп мәлімдеді Ішкі істер вице-министрі Берік Бисенқұлов.
«Объективті себептерге байланысты игерілмеген қаржы көлемі 496 млн, оның ішінде 146 млн – бұл Ресейге қатысты белгілі бір санкциялардың болуы салдарынан арттехқарулардың жеткізілмеуінен орын алды. Ресейге салынған санкциялар бізге де әсерін тигізді. Және осы ретте объективті себептерге байланысты біздің жеткізушілер жеткізе алмады», – деді Бисенқұлов бейсенбіде парламент мәжілісіндегі республикалық бюджеттің орындалуы туралы есеп таныстырылымында.
Вице-министр ІІМ игерілмеген 3,1 млрд теңгенің 2,407 млрд-ы ТЖ комитеті үшін көп профильді мобильді кешеннің жеткізілмеуіне байланысты екенін айтты.
Оның айтуынша, күрделі жөндеу бойынша ІІМ 182 млн теңге игермеген, ол жеткізушінің өз міндеттемелерін орындамауымен байланысты.
Сондай-ақ 136 млн теңгенің игерілмеуі штаттық санының толық еместігінен, 62 млн-ы – тауар жеткізу бойынша жеткізушілердің шарттық міндеттемелерін орындамаулары салдарынан орын алған.
«Бұл ретте біз жұмыс жүргізудеміз, тиісті шағымдар жіберілді, біз қазір олармен соттасып жатырмыз. Жалпы қалған сома бойынша – олар азғантай ғана, олар бойынша да қажетті жұмыстар жасалуда», – деп түйіндеді сөзін Бисенқұлов.
Дереккөз: КазТАГ
