Сенатор қазақ тілінде баяндама жасамайтын басшыларды сынады

2
185
ҚР Парламенті Сенатының экономикалық саясат, инновациялық және кәсіпкерлік комитетінің отырысында депутат Сәрсенбай Еңсегенов мемлекеттік тілде баяндама жасамаған басшыларды сынады, деп хабарлайды Baq.kz тілшісі.

Бүгін аталған комитетте «ҚР Президентінің «Қазақстанның үшінші жаңғыруы: жаһандық бәсеке қабілеттілік» атты Қазақстан халқына жолдауын іске асыру аясында Қазақстан экономикасына инвестициялар тартудың өзекті мәселелері» тақырыбында дөңгелек үстел ұйымдастырылды.

Оған инвестициялар және даму вице-министрі Ерлан Хаиров, ұлттық экономика вице-министрі Айбатыр Жұмағұлов, Қаржы вице-министрі Руслан Бекетаев, Сыртқы істер министрінің бірінші орынбасары Мұхтар Тілеуберді, «Қазақстан даму банкі» АҚ басқарма төрағасы Болат Жәмішев, «Самұрық-Қазына» ұлттық әл-ауқат қоры» АҚ басқарма төрағасы міндетін атқарушы Нұрлан Рахметов, «KazakhInvest» Ұлттық компаниясы» АҚ басқарма төрағасының міндетін атқарушы Мейіржан Мәйкенов қатысты. Алайда басшылардың басым бөлігі өз баяндамаларын ресми тілде оқыды.

Осы орайда сенатор Сәрсенбай Еңсегенов қазақ тілінде баяндама жасамаған басшыларды сынға алды.

«Шынын айтқанда, депутаттардың сұрағы көп. Сондықтан сіздер бізбен бірігіп, жұмыс жасауға ықыласты болады деген ниеттеміз. Біздің мемлекет – тәуелсіз. Президенттің «Болашаққа бағдар: рухани жаңғыру» деген мақаласын білесіздер. Мен бүгін бақылап отырдым. Осында маңызды мемлекеттік саясатты жүргізіп отырған, мемлекеттік органдардың басшылары ретінде біреуіңіз мемлекеттік тілде баяндама жасамайсыздар. Сіздер кімдерді таныстырасыздар? Сіздер тәуелсіз қазақ елін таныстырасыздар. Тәуелсіз қазақ елінің экономикалық әлеуетін көтеру мақсатында жұмыс істеп жүрсіздер», – деді ол.

Кейін депутат мемлекеттік органдар мен ұлттық компания басшыларының сенатқа әкелген құжаттарындағы ақпарат маңызды екенін, бірақ ондағы ақпараттардың қазақ тілінде жазылу қажеттігін атап өтті.

«Мына берілген құжаттарыңызда өте маңызды ақпараттар бар. Мен орыс және ағылшын тіліне қарсы емеспін. Бірақ (құжаттар – автор) мемлекеттік тілде болу керек. Осы құжаттарды қазақ тілінде берсеңіздер деген ұсыныс бар. Осыны ескерсеңіздер деген тілегіміз бар», – деп түйіндеді сөзін Сәрсенбай Еңсегенов.

2 ПІКІРЛЕР

  1. Ресми іс-қағаздарын жаппай тек қана мемлекеттік тілде жүргізу – менің арманым! Мына сөз сол арманымның ұшқынын көргендей сезімде қалдырды. Біз «тіл،тіл» дейміз. Ана тіліміздің мәртебесін арттырудың тек бір ғана жолы бар: ол барлық құжаттарды ана тілінде жазуды талап ету. Басқа бірде-бір тілді қыстырмау керек.

  2. Мен қазір үлкен қуаныш сезіміне бөленіп отырмын. Айтып жеткізу мүмкін емес. Алланың нұры жаусын сізге، құрметті Сәрсенбай Еңсегенов мырза!

Пікір жазу

Пікіріңізді енгізіңіз!
Атыңызды енгізіңіз