Қазақстан Республикасының премьер-министрі Кәрім Мәсімов Шығыс Қазақстан облысын 5 жыл басқарған Бердібек Сапарбаевтың аймақтағы қызметінен кету себебін түсіндірді.
Бұл туралы yk-news.kz сайтына сілтеме жасап NUR.KZхабарлайды.
“Бердібек Мәшбекұлының тәжірибесі мол. Ол вице-премьер қызметінде әлеуметтік сала мәселелерін шешеді деп ойлаймын. Президент ел дамуында ерекше рөл атқаратын “Нұрлы жол” бағдарламасы туралы айтты. Енді осы бағдарламаны атқаруда Бердібек Мәшбекұлының мол тәжірибесі көмектеседі деп ойлаймын”, – деді Мәсімов.
Ал өз кезегінде Бердібек Сапарбаев Шығыс Қазақстан облысында өткізген қызметіне көңілі толатынын жеткізді.
“Жаңа қызмет президенттің маған деген сенімін білдіреді. Мен осында 5 жыл 9 ай бойы менімен бірге болған әріптестеріме рахмет айтқым келеді. Егер қатты сөйлеген кезім болса, кешірім өтінемін. Жұмыстың аты жұмыс”, – деді Бердібек Сапарбаев.
Өңірдің жаңа басшысы Даниал Ахметов мемлекет басшысының сенімін ақтайтынын жеткізді. “Менің арқамда үлкен жауапкершілік тұр. Ол – ұлы адамның (Нұрсұлтан Назарбаев – автор) сенімін ақтау”, – деді Даниал Ахметов.
