Обама: Ресей экономикасы құлдырау алдында тұр

0
37

АҚШ президенті Барак Обама америкалықтарға арналған жыл сайынғы жолдауында халықаралық саясатқа қатысты «әскери күш-қуат пен берік дипломатияға» сүйене отырып «Американың көшбасшылық рөлі» стратегиясын жалғастыра беру қажет дегенді алға тартты.

Обама: Ресей экономикасы құлдырау алдында тұр
Барак Обама. Фото: РИА Новости

АҚШ президенті «Пәкістаннан бастап Париж көшелеріне дейін еніп кеткен террористермен аяусыз күрес жүргізуге» уәде беріп, конгрестен радикалды «Ислам мемлекеті» ұйымының содырларына қарсы жаңа әскери күшті қолдауды сұрады.

Қараша айында республикашылар бақылауына өткен сенат пен өкілдер палатасының алдында сөйлеген Обама конгресті елде заманауи порттар, берік көпірлер салу, жүрдек пойыздар шығару және ұшқыр интернет байланысын дамыту жобаларын қолдауға шақырды.

Обама бұған қоса Вашингтон үлкен мемлекеттер шағын елдерге «тізесін батырмауы тиіс» деген ұстанымынан айнымайтынын да айтқан.

Барак Обама АҚШ Ресейдің басқыншылығына қарсы тұратынын және Украинадағы демократиялық өзгерістерді қолдайтынын білдірген.

Республикашыл саясаткерлердің көпшілігі бұған дейін Обаманың кейбір ішкі саясаттағы ұстанымдарына қарсылық білдірген. Жолдауда Обама конгресс мүшелерін бірлесе жұмыс істеуге және Демократиялық партия мен Республикалық партия арасында басараздық тудырмауға шақырған.

Барак Обама Ресейге салынған санкциялар Мәскеуге ауыр тигенін айтып, Ресей президенті Владимир Путиннің әрекетін «стратегия мен күш-қуатын ойнату» деп бағалау қате деді. «Қазір АҚШ күшті және ол өз одақтастарымен бірге, ал Ресей оқшауланып, экономикасының тас-талқаны шықты» деді Обама.

АҚШ президенті конгресс ұсынғандай Иранға қарсы санкциялар салу Тегеранмен ядролық бағдарламаға қатысты келіссөзді үзуі мүмкін екенін ескертті.

Ол сондай-ақ жолдауында «бірнеше жылғы экономикалық рецессия мен Ауғанстан және Ирактағы соғыстан кейін АҚШ-тағы дағдарыстың елесі өтті және қазір елдегі жағдай тұрақты» деп мәлімдеді.

Источник: Азаттық

Пікір жазу

Пікіріңізді енгізіңіз!
Атыңызды енгізіңіз