Ақтауда ең беделді деген әскери бөлімнен шу шықты. Теңіз жаяу әскерінің 6 бірдей сарбазы өз басшыларынан аяусыз таяқ жегендерін айтып, шағым түсірді, деп хабарлайды КТК арнасы.Олардың соққыға жығылғанын тексеру қорытындысы да растаған. Оқиға қаңтар айының ортасында болыпты. Жас сарбаздарды төпелеп ұрғандар – бір ротаның командирі мен оның қоластында келісім-шартпен істейтін 3 әскери қызметкер екен.Олар жас сарбаздарды бұйрықты орындамағаны үшін соққыға жыққан көрінеді. Қазір бұл төртеуіне қатысты «қызмет бабын асыра пайдаланды» деген айыппен қылмыстық іс қозғалып жатыр.
Егер айыптары дәлелденсе, 5 жылға дейін бас бостандығынан айырылуы мүмкін. Күдіктілердің барлығы әскери қызметтерден түгел шеттетілген. Тіпті олардың екеуі өз кінәсін мойындап та қойыпты.
«Қалай ұрып жатқандарына мән бермеген де. Біреуін қойма бөлмесінде, екіншісін киім үтіктеу бөлмесінде, ал үшіншісін жуыну бөлмесінде соққыға жыққан. Әрқайсысы әр түрлі уақытта және әр түрлі жерде. Алайда, барлығы бір күнде болған», — дейді Батыс аймақтық әскери тергеу басқармасы бастығының орынбасары Талғат Жәлеков.
По сообщению сайта Nur.kz
