Өскеменде қаңғыбас иттер қаптап кетті. Қаланың шет жағында үйір болып көше кезетін олар адам мен үйдегі ит, мысықтарға шабады екен.
Бұл туралы КТК арнасы хабарлайды.
Қаладағы травматологиялық бөлімшелерге осылай ит қапқан 70-тен астам адам түскен. Дәрігерлер әрқайсына құтырма ауруының алдын алу үшін екпе салуда.
Ал жабайы иттерді аулаумен айналысатын мекеме қызметкерлері жұмысымызды артығымен орындап қойдық деп отыр. Айтуларынша, енді қауіптенетіндей қалада қаңғыбас иттер қалмаған.
«Дүкенге далаға шықсақ, қолымызға тас таяқ ұстап жүретін болдық. Жабайы иттер әсіресе жер үйлердің арасында өріп жүр», – дейді тұрғындар.
«Барлық көшелердегі жағдай осы. Қаңғыған иттер үйдегі иттерді ғана емес, мысықты да жеп жатыр. Түнде үріп жатқандарын естисің. Таңертең қарасаң айналаның бәрі қан болып жатады.
Емханаға бір айда ғана жабайы ит қапқан 70-тен астам адам түскен. Зардап шеккендердің әрқайсысына құтырманың алу үшін екпе салынып жатыр. Десе де, жағдай ушыға беретін болса, дәрі бәріне бірдей жетпейді дейді дәрігерлер.
«Егер адам құтырма ауыруына шалдықса оны емдеу мүмкін емес. Тек екпе салып алдын алуға болады. Сондықтан жабайы иттердің көзін жою керек», – дейді дәрігер Лариса Попова.
Ал жауаптылар болса, жабайы иттерді аулап жатырмыз дейді. Ол үшін қалалық бюджеттен жылына 9 миллион теңге бөлінеді екен. Бірақ ит атуға шыққандардың бір мылтығынан басқа қаруы болған жоқ.
«4 қосымша бригада шығады. Сосын шақыртумен жұмыс істейтіндер бар. Олар күніне 30-25 ит атады. Сонда да қиындықтар бар», – дейді Өскемен қалалық әкімдігінің бөлім басшысы Заманбек Серікбаев.
Шенділер алдағы аптада адамға шабатын ит қалмайды деп сендіріп отыр. Тек, оған дейін тұрғындарды сақ болуға шақырды.Екі жыл бұрын осындай иттер ер адамды талап тастаған. Сау тамтығы жоқ мүрдені туыстары тек киіміне қарап таныған болатын.
