Әуе апатынан аман қалған Әсем Шаяхметованың жағдайы жақсарып келеді. Ол келесі аптада ауруханадан шығарылады деп хабарлайды Астана арнасы.Еске салайық, осыдан бір айдан астам уақыт бұрын Жамбыл облысында АН-2 ұшағы апатқа ұшырады. Әуе кемесінде болған 7 адамның ішінде 1986 жылы туылған Әсем Шаяхметова тірі қалған еді. Алдымен Шу қалалық ауруханасына, соңынан Астанаға жеткізілген Әсемге 9 ота жасалды. Барлығы сәтті аяқталған. Қазір ол балдақтың көмегімен жүріп жүр.
«Оталардың бәрі жасалып болды. Қазір 3 жұмадай болды, науқас өздігінен тұрып жүр. Реабилитациялық ем біткеннен кейін 4-5 айдан кейін жұмысқа шығуына болады», — дейді Астанадағы №1 қалалық аурухананың травматологиялық пункт меңгерушісі Нұржан Естемесов.
Ауруханадан шыққан соң Әсем сынған сүйектері толық жазылғанша, 1 жыл бойы дәрігерлер бақылауында болуы тиіс. Ал үйінде емдік гимнастика мен жаттығулар жасайды. Қазір науқастың көңіл-күйі де өте жақсы. Толық жазылғанша, ол Астанада боламын деп отыр.
«Дәл қазір жағдайым жақсы. Дәрігерлердің арқасында тез жазылып келе жатырмын. Өз еркіммен жүруге тырысып жүрмін. Бар арманым — тезірек өз аяғыммен жүріп кету. Толық жазылған соң, бұрынғы жұмысымды жалғастыратын боламын», — деді Әсем Шаяхметова.
По сообщению сайта Nur.kz
