Алматы облысында әскерден қашып кеткен жауынгер Серік Дәуленбай 16 жыл қатаң режимдегі калонияда жазасын өтейтін болды.«Серік Дәуленбай 255 баптың 1 бөлімі (қаруды, оқ-дәріні, жарылғыш заттар мен жарылғыш құралдарды ұрлау немесе бопсалау), 175 бабының 1 бөлімі (ұрлау), 24 баптың 3 бөлімі (қылмысқа дайындалу және қылмыс жасауға әркет ету), 200 баптың 1 бөлімі (ұрлау мақсаты болмасада автомобиль немесе өзге қатынау құралын заңсыз иелену), 373 баптың 2 бөлімі (әскери қызметтен қашушылық) бойынша кінәлі деп танылып, жазасын 16 жыл қатаң режимдегі колонияда өтеуге кесілді», — деп хабарлады әскери соттың баспасөз қызметі.
20 ақпанда шығарылған үкім бүгінде заңды күшіне енді.
Естеріңізге сала кетейік, 18 қыркүйекте 21/77 әскери бөлімінде автопарк бойынша күндізгі кезекшісі, мерзімдік әскери қызметтің қатардағы жауынгері Серік Дәуленбайдың жоқтығы тіркелді. Оған іздеу жарияланды.
Осы ретте, БАҚ-та бөлімде әскери қызметкер мен солдат төбелесіп қалған, кейін әскери қаруды алып қашып кеткен деген ақпарат пайда болды.
19 қыркүйекте жедел-іздестіру шаралары аясында кеден қызметінің мамандары Серік Дәуленбайды құрықтады. Жауынгерден қару мен оқ-дәрілер тәркіленді.
Кейінірек белгілі болғандай, Дәуленбай әскери бөлімнен қашпас бұрын әскери госпитальда көз жұмған, келісім шарт бойынша жұмыс істейтін әскери қызметкермен төбелесіп қалған.
По сообщению сайта Nur.kz
